Beinvegni ella Casa d’Angel
La fundaziun da cultura Lumnezia tgira e promova la cultura lumneziana e cultivescha la schientscha per las valurs dalla vallada
Ella sustegn projects ed activitads davart lungatg, natira, architectura e cultura.
Exposiziun
La Casa d’Angel tschaffa mintg’onn ina certa tematica e lavura si quella en exposiziuns d’art alternontas. En quellas vegnan damondas davart aspects culturals, sozials, economics, historics e politics, che fatschentan nossa regiun, reflectadas.
En vesta dil giubileum centuar da 600 onns Ligia Grischa, da 500 onns dallas Treis Ligias e da 10 onns dalla Vischnaunca fusiunada, ein fusiuns politicas il tema annual da uonn.
Cheu anfleis Vus pliras informaziuns davart nossas exposiziuns
Stizunetta
Ella Casa d’Angel havein nus ina stizunetta, nua che nus purschin products artisanals specials e cudischs dalla regiun.
Cristagl
Ils renomai cristagls dil Péz Regina s’audan tier las gruppas las pli grondas ch’ein vegnidas anfladas tochen oz en las Alps. La gruppa ch’ei en possess da l’uniun da cultura Pro Lumerins secatta en la Casa d’Angel.
All’entschatta matg digl onn 2000 ha ina aveina da quarz sil Péz Regina svegliau igl interess dil cavacristallas Michael Flepp, sesents a Cumbel. Il cletg ha manegiau bein cun el. Spert ha el teniu enta maun in toc d’in cristagl da 20 cm. Suenter cuort temps ha el realisau l’immensa dimensiun dil scazi. Ensemen cun siu bien cumpogn e cavacristallas Alfons Derungs da Surcasti ha el luvrau e barhau treis onns tochen ch’els han saviu transportar a val cun helicopter dus cristagls da mintgamai rodund ina tonna.
Archiv cultural
Igl Archiv Culrtural Lumnezia ad Uors rimna ed archivescha cudischs, documents, objects da mintgagi da pli baul e fotografias, che fan perdetga alla cultura lumneziana dils davos tschentaners.
Plinavon vegn perscrutau e documentau continuadamein la genealogia da famiglias lumnezianas. Quei grond scazi cultural ei archivaus ed exponius ella casa da scola ad Uors.
Residenza
Il project «residenza» porscha ad artistas e creacultura la pusseivladad da seretrer en in vitg muntagnard grischun per sefatschentar en lur lavurs intensivamein cun tematicas relativas al liug.
